Сёрмадовкст Кузьмичень пельде-2. Провинциальной футболось

Сёрмадан кадозь пси тешкстнэде мейле. «Мордовиясь» кодаяк эзь изня армеецтнэнь марто. Весе лиссь тевень коряс. Ней минек клубонть арасть виензэ налксемс топ-клубтнень марто. Мекс? Команданок налксемазо провинциальной, таркань-таркань. Мезе чарькодеви те смустенть ало? Икеленек васенце лигань вадря команда эли «вышкасо» омбоце пелькссэ аштиця. Ансяк аволь анок налксемс Европасо ды прявт оштнэсэ. Бути улевель покш мель, сестэ «кундавольть» вейкешка налксема ды ансяк сестэ, зярдо топ-клубось улевель кризиссэ эли беряньстэ налксиль.

Мейсэ неяви провинциальностесь: васняяк, тей-тов якамосо, команданок теи ламо вишка перепасовкат, седе ламо паксянь эсь пельксэнть лангсо. Бути ятонть пельксэнзэ лангсо те тейневи, но аволь пек сеедьстэ, секскак армеецтнэ сезнесть «эрзянь-мокшонь» квадраттнэнь эйсэ – передачась кундазь ды учок берянь ёнкс эсь ортатнень икеле. Минек налксицянок, Алдониндэ башка, максыть виде кувака передачат. Сынь теке пелить манявомс, пелемс а эряви. Эряви улемс седе виевекс. Ильведевкстнэяк кармить, но бути налксицясь машты налксеме футболсо, сестэ сон а теи сядо процентэнь ильведевкс. Лецтинк, зярдо ЦСКАсь пансь омбоце оска – ульнесь кувака передача, ды Дзагоев прок вадрясто анокстазь чави гол.
Истя налксезь «Мордовиясь» эзь изня. Ламот передачатне пачколесть беряньстэ: те неявсь оштё «Локомотивенть» марто налксемстэ. Ансяк ушодыть путомо вий чугункань кинь налксицятне, кода минсенектне сеске ёмить. Сестэ эряви теемс истя, улевель минек налксицятнень бразильской техникаст эли вадря идемань линия. Ансяк теяк ды сеяк «Мордовиянть» арась. Алдонин ськамонзо футболонь паксясо аволь тюриця. Мекс лоткась чавномадо Руслан Мухаметшин – ятонть идемазо пек парсте налкси. Бути Мухаметшиннэнь а понги оска, сон а чавияк. Секскак эряви ськамозот варчамс ютамс осканть марто. Истя кода «вышкасонть» налксицятнень техникаст пек паро, тень удалы теемс пек чуросто.

Парсте чарькодян, монь «арсеизматне» марявить пеедькшнемакс, ансяк тагояк ёвтан, мон Кузьмич ды монь арсематне – те ансяк монь мелем.

Арсян «Мордовиянть» улить виензэ кадовомс 12-це таркасо. Неяви, налксицятне тонавтнить. Кежей ЦСКАсь налкси вадрясто. Те паро команда, но лиятнеяк бажить эйсэнзэ «сусконемс». Иля пеле, Щербаченко ялгась!

Сы налксеманть «Мордовиясь» ютавты махачкалинецтнэнь марто. Варштасынек, кода сон карми ютамо. «Анжи» – те аволь куншкасо аштиця команда, но оштё и аволь топ-клуб. Карми неявомо, конась неть клубтнень эйстэ седе аволь провинциальной.